Jeta është si ajo dita e këndshme që fillon me rezatim diellor që në mëngjes. Por, ja ashtu papritur në atë rrezatim verbues shfaqet ajo reja e zezë, si rrebesh i verës, mbulon gjithçka….  Kështu ka nisur jeta e dy vajzave të vogla nga Hasi Redianën 7 vjecare dhe Suadën 10 vjecare.

Varfëria në këtë familje është ulur këmbëkryq dhe ato që e vuajnë më tepër janë vajzat e vogla, të cilët janë detyruar të ndjekin shkollën jo rregullisht, të braktisin fëmijërin e tyre. Duke qënë se dhe prindërit janë  njerëz me aftësi të kufizuar (shurdh-memecë), ajo që u vjen në ndihmë është gjyshja e tyre e cila gjen forcën dhe kërkon fijen e shpresës për të shpëtur dy mbesat e saja.
“Të mos shohësh dritën e diellit, të mos shohësh jetën të cilën po jeton, është verbërimi i syve të dy mbesave të mia….“

Këto rrjeshta të shkruar në një letër dhe mbërritur në Fondacion në një nga zonat më të thellla të vëndit tonë,  përvecse vuajtjeve të përjetuara nga e gjithë familja, shprehte kërkesën për mbështetje dhe ndihmë për operimin e syve për dy motrat Redianën dhe Suadën. Shpresa e madhe e familjes u kthye në një realitet nga Fondacioni Fëmijët Shqipëtarë, i cili është i vendosur në misionin e tij, të ndihmojë fëmijët në gjithë Shqipërinë për të lehtësuar dhe shëruar dhimbjet e tyre, fizike apo psikologjike.Falë bashkëpunimit me Spitalin Amerikan në Tiranë vajzat iu nënshtruan operacionit në sy për të korrigjuar katarakten kongenitale. Fondacioni i Fëmijëve Shqiptarë dhe Spitali Amerikan i Tiranës për të disatën herë u vijnë në ndihmë së bashku fëmijëve në nevojë. Operacioni i kataraktës kongenitale, ose e quajtur ndryshe, kataraktës së lindur, është një ndërhyrje që kërkon jo vetëm një ekip të përgatitur dhe ekspertizë në këtë diagnosë por edhe një metodologji e aparatura moderne. Ky operacion i mundësuar nga Spitali Amerikan në bashkëpunim me Fondacionin e Fëmijëve Shqiptarë vjen në vazhdën e projekteve te suksesshme e të përbashkëta që këto të fundit kanë ndërmarrë. Zj. Liri Berisha ditën e sotme, me 13 Nëntor, ishte e pranishme në Spitalin Amerikan për të vizituar Redianën dhe Suadën menjëherë pas operacionit të njërit sy (për të dy vajzat). Rezultati pozitiv, kthimi i shikimit tek të dy vajzat ishte nje cast emocionues dhe shumë prekës për te gjithë familjaret. Zj. Liri Berisha shprehet shumë e emocionuar për këto momente vërtet të vecanta dhe të paharrueshme për prindërit dhe gjyshen e tyre, si dhe uron suksese në etapën e dytë të operacionit i cili do të pasojë me syrin e dytë.Në emër të Fondacionit të Fëmijëve Shqiptarë Zj Liri Berisha dhe në emër të Spitalit Amerikan Z. Klodian Allajbeu Drejtor i Përgjithshëm i këtij spitali, kanë shprehur disa herë impenjimin e tyre për vazhdimësinë e të tilla projekteve të përbashkëta që do u vijnë në ndihmë fëmijëve me problem të ndryshme shëndetësore, kryesisht të pa trajtueshme brënda vëndit.